เปิงเปิ้นวาสนาหนาปากแต๊ๆเนาะ
ลุกขวายมาไปเตวแอ่วกาด ธัมโม สังโฆ
ไปป๋ะใส่เปิ้นกะลังเอาเห็ดคนมาส่งแม่ก๊าปอดี
กันไปเจ๊าก่ะตึงบ่ป๋ะ ขวายเหลือนี้แถมหน้อย ... หมด
เนี๊ยะนิตี้เปิ้นว่า ของชุอันปันอย่าง มันจะมีช่วงเวลา
ตี้มันเหมาะสมของมัน บางอย่างเฮาก๋ำหนดบ่ได้
อู้เรื่องเห็ด สดไปเรื่องหยังหุ เนี๊ยะเปิ้นตึงว่าคน
อู้ได้ไปเปลื๋อง อู้ไปสั๊พป๊ะ

แก๋งเห็ดคนเมนูนี้เป๋นเมนูตี้ประยุกต์สุดๆ
แต่ก่ะประยุคได้จ๋นลงตั๋วสุดๆเหมือนกั๋น ... ย้อนว่ามันลำ
หีบน้ำแก๋งกำนิตึงบ่ไคร่ลืน ขออมเอาไว้ในปากสักกำ
ย้อนว่ามันหว๊านนนนนนนน .... หวาน หมานตี้บ่มีรสใดเผียบ
ลองผ่อเทิอะ .... กันได้กิ๋นสักเตื้อจะบ่ลืมข้าเจ้าแน่นอน อิอิ

ส่วนผสม

๑. เห็ดคน
๒. ไข่มดส้ม
๓. ผักหวาน
๔. ก้อมก้อขาว
๕. ผักหละ
๖. จั๊กไค

เครื่องแก๋ง

๑. พริกแต้ดิบ
๒. หอมเตียม
๓. เกลื๋อ
๔. กะปิ
๕. น้ำฮ้า

ต๋ำเครื่องแก๋งหื้อมอกเหลือกปุ๊นเหลือกเพ้กะปอละ

วิธียะแก๋งเห็ดคนเมนูนี้

ตั้งน้ำหม้อแก๋งหื้อเดือด ใส่จั๊กไคตุ๊บลงไป ตวยด้วยเครื่องแก๋ง
รอจ๋นน้ำเดือดปุ้งจะลั่น จะลั่น ใส่เห็ดคนลงไป รอจ๋นน้ำเดือด
ใส่ไข่มดส้มลงไป ปิดฝาหม้อละไว้ รอหื้อน้ำหม้อแก๋งมอกปอ
ใส่ใบก้อมก้อขาว ฟื้นไปๆมาๆ ใส่ฝักหวาน ฟื้นไปๆมาๆ
ใส่ผักหละ ฟื้นปุ้น ฟื้นเพ้ ... ป๋ดหม้อแก๋งลงเลยเจ้า จะไปละผักไว้เมิน
ตักใส่ถ้วย แต่งดาขันโตก นั่งขดต๋าหวานเวิ้น ... ลงมือเลยเจ้า
รับรองว่าเมนูนี้มันตึงเหลือได้ขึ้นสวรรค์จั๊นฟ้าก่อนเจ้า ... เหม๊าะ อิอิ