เมืองอีสานเฮานี้มีของดีหลายอย่าง เอกลักษณ์ค่าล้ำงามล้นเกิ่งกว่าไผ ผ้าไหมลายแพรใช้แต่พ่อใหญ่เดิมดา แต่คุณย่าคุณยายเพิ่นพากันเฮ็ดใช้ เทิงเลี้ยงไหมโตม้อนเก็บใบมอญมาเกียแบ่ง คอยเบิ่งเช้าเบิ่งแลงเอาใจใส่บ่น้อยคอยเพียรสร้างอยู่บ่เซา ประโยชน์มีหลายล้นใช้นุ่งห่มกายา เทิงเป็นของสมมาคุณใช้ตุ้มอุ่นยามหนาวได้ ผ้าของไทยเฮานี้มีคุณหลายตั้วแม่ใหญ่ ผ้าไหมร้อยแก่นสารสินธุ์ก็หากได้สิจาเว่าสุท่านฟังแท้แหล่ว
.
ผ้าไหมงามล้นคนกะเอาใจใส่ ทอเป็นแพรผืนไหมให้เฮาใช้อยู่ซุวัน งามเลิศล้ำวิธีทำบรรจงไว้ เอกลักษณ์ผืนใด๋ ปานอินแต้มแต่งลง
.
ร้อยเอ็ดงามเหลือล้น ลายสาเกตุนครงาม นาคน้อยตามลายขิด ลายขอกะงามล้น จนคนได้กล่าวย่อง ลายบักจับงามล่ำ ผ้าสโร่งงามล้ำ เมืองเกินร้อยค่อยส่งเสริม
.
ขอนแก่นนี้ลายมัดหมี่ผืนไหม ชื่อเสียงโด่งดังไกล ลายกงกะงามแท้ ลายนกเชิงเทียนพร้อม เทิ่งหมู่ลายปลาซิว เบิ่งเป็นทิวเป็นแถว ตาสะออนเมืองขอนนี้
.
สารคามก้ำเมืองตักศิลาหนอ สร้อยดอกหมากลายทอแต่ โบราณเดิมเค้า ลายโคมเก้ามัดหมี่ซิ่นไหม เป็นลายงามวิลัยเมืองสารคามเอ่ย
.
กาฬสินธุ์ก้ำเมืองดินดำ น้ำชุ่ม ผู้ไทซุมพี่น้อง กะทอผ้าแพรไหม แพรวาได้เป็นดั่งราชินีผ้าไหม ลายวิจิตรของผู้ไทเอกลักษณ์เมืองน้ำดำ
.
ให้พ่อแม่พี่น้องช่วยกันสืบสาน ให้ได้เป็นตำนานผ้าไหมของเฮานี้ อนุรักษ์เอาไว้ผ้าร้อยแก่นสารสินธุ์ ให้อยู่คู่แผ่นดินเมืองอีสานของเฮาเอย