แนวกินอีสานบ้านเฮา 100 เมนู ตอนที่ 36 เมนูที่ 36 แกงสับนก





แนวกินอีสานบ้านเฮา 100 เมนู ตอนที่ 36
เมนูที่  36 แกงสับนก









เมนูในตอนนี้ เป็นเมนูของคนบ่แข็งบ่มีแฮงเด้อครับ

(บักอ้ายหมายถึงบ่แข็งแรง อย่าคิดลึกเด้)เพราะว่าเมนูแกงสับนก

ถือได้ว่าเป็นเมนูโบราณที่บรรดาเมียๆสิมักสิเฮ็ดให้คุณสามีกิน

เพราะถือว่าเป็นเมนูยาชูกำลังชั้นดี ย่อนว่ามีส่วนประกอบจากเหง้ากระชายนั่นเอง

เฮากะเลยมักสิได้เห็นในละครหลายๆเรื่องว่าบรรดาเมียๆสิเฮ็ดมาบำรุงบำเรอผัวเจ้าของ


สำหรับผู้บ่าว หรือผู้บ่าวเหลือน้อย ที่อยากกระชุ่มกระชวยอยู่ตลอดเวลา

ต้องลองกินเบิ่งจักเทื่อครับ เมนูนี้บ่ถือว่าเป็นแนวกินคนอีสานโดยตรง

หากแต่ว่าอีแม่ของบักอ้ายกะมักเฮ็ดให้อีพ่อกินอยู่บ่อยเทื่อ

(ขนาดกินแล้ว ยังมีลูกแค่สองคนเนาะ)


เพราะความเผ็ดฮ้อนและจัดจ้านของเมนู เลยเฮ็ดให้คนกินกินข้าว

ได้หล๊ายหลาย เอิ้นว่าเจริญอาหารสุดๆกะว่าได้



บักอ้ายกะเลยอยากสิเอาสูตรมานำเสนอให้พ่อแม่พี่น้องได้ลอง

เอาไปเฮ็ดกินลองเบิ่ง ของดีกะต้องบอกต่อ แม่นบ่



ในสมัยก่อนอีพ่อกะสิพาบักอ้ายไปดักนกขุ่มตามป่าหญ้า ผิวปากเลียนแบบเสียงนก

ให้มันย่างเข้ามาจนมาติดบ่วงที่เฮาดักเอาไว้ พอได้นกขุ่มกะเอามาถอนขน

แล้วกะสับจนแหลกละเอียด แล้วค่อยเอามาแกง กะเลยเอิ้นว่า แกงสับนก

แต่ว่าปัจจุบันนกขุ่มหายากแล้ว คนทั่วไปกะเลยดัดแปลงใช้เนื้อปลาแทน

บักอ้ายเองกะขอให้เนื้อปลาตองหรือว่าเนื้อปลากรายแทนคือกันเนาะครับ



ส่วนผสมของแกงสับนกกะมี

ปลาตองหรือว่าปลากรายขูดเอาแต่เนื้อ
มะเขือเปราะ
มะเขือพวง
ถั่วฝักยาว
พริกชี้ฟ้าใหญ่
ใบกะเพรา
กะทิ










ส่วนผสมของพริกแกง

กระชาย
(คันอยากให้มันงัดปึ้งปึ่งปั๋งคักๆ บักอ้ายแนะนำให้เอาเหง้ากระชายแก่ๆ
ตากแดดจนแห้งแล้วกะเอามาป่น ใส่ลงไปนำ รับรองมีความสุขทั้ง
คนกินคนเฮ็ดอะโลด แต่มื้อนี้บักอ้ายใส่แค่กระชายธรรมดา ย่านบีมีหม๋องลงพะนะ)
บักพริกดิบ กับ บักพริกแห้ง
ข่า
ตะไคร้
ใบบักกรูด
กระเทียม
หอมแดง
รากผักชี
ผิวมะกรูด
กับ กะปิอย่างดี






เครื่องปรุง

น้ำตาลปี๊บ
น้ำปลา
เกลือ
น้ำมันหอย







วิธีเตรียมส่วนผสมน้ำพริกแกง

เอาผักทั้งหมดไปล้างน้ำให้สะอาดโลด ล้างหลายๆน้ำเด้อ

คุมื้อนี้สารพิษมันหลาย วิธีล้างผักที่ดีที่สุด คือจากจากน้ำก๊อก

เปิดให้น้ำไหลแฮงๆ มันสิได้ล้างสารพิษออกไปให้หมด
(บักอ้ายเบิ่งมาจากโทรทัศน์)


แล้วเอาหัวหอมแดงมาปอกแล้วหั่นเป็นชิ้นน้อยๆ พักไว้

เอาข่าแก่ ตะไคร้มาซอยให้ละเอียดนำ

มะกรูดปอกเอาแต่ผิวมัน แล้วนำผิวไปซอยให้ละเอียดคือกัน






หันมาตำน้ำพริกแกงก่อนเลย

เอาพริกแห้งกับเกลือมาใส่ครกตำให้มันละเอียด ตามด้วย บักพริกสด

ข่า ตะไคร้ และผิวมะกรูด ตำต่อจนละเอียดดี ใส่หัวหอมแดง หัวกระเทียม

กระชายและกะปิลงไปตำต่อจนละเอียด จากนั้นกะตักขึ้นมาเตรียมเอาไว้








ต่อมาเฮากะมาเตรียมเครื่องปรุง

เริ่มจากเอ็ดปลากรายก่อนเนาะ ปลากรายหรือว่าปลาตองขูดเอาแต่เนื้อ

ใส่เกลือลงไปจักหน่อย ตามด้วยน้ำเปล่าประมาณช้อนโต๊ะหนึ่ง

คั้นให้เข้ากัน แล้วกะปั้นให้เป็นก้อน

ตั้งกระทะด้วยหางกะทิ ใช้ไฟกลางๆพอ เอาก้อนปลากรายของเฮาลงไปลวก

ลวกให้สุกประมาณ80%กะพอ วิธีนี้จะช่วยบ่ให้ปลากรายหรือว่าปลาตองมีกลิ่นคาว








จากนั้นก็กลับมาจัดการพวกผักต่อ

มะเขือเปราะหั่นสี่ มะเขือพวงมาเด็ดแล้วนำแช่ในน้ำ ใส่เกลือจักหน่อยบ่ให้มะเขือดำ

นำพริกชี้ฟ้าแดง กับ ถั่วฝักยาว หั่นแฉลบพักไว้

นำใบมะกรูดฉีกเตรียมเอาไว้ ใบกะเพรามาเด็ดเป็นใบเตรียมเอาไว้ให้พร้อม

ส่วนกระชายเอามาหั่นบางๆเตรียมไว้อีก






สุดท้ายกะมาถึงขั้นตอนการแกง

เอาน้ำมันเทใส่ ตามด้วยเครื่องแกง ผัดด้วยไฟอ่อนจนหอม

ค่อยเอาหัวกะทิใส่ลงไปกระทะ เร่งไฟให้ไฟปานกลาง

เคี่ยวจนกะทิเดือด ใส่มะเขือลงไป ตามด้วยปลากรายที่เฮาต้มเอาไว้แล้ว

  ใส่บักเขือพวง ถั่วฝักยาว แล้วค่อยปรุงรส ด้วยน้ำตาล น้ำปลา

และ น้ำมันหอย ชิมรสชาติให้เผ็ดร้อนถูกใจ ค่อยตามด้วย

พริกชี้ฟ้าแดง กับใบกระเพรา เสร็จแล้วกะตักใส่ถ้วยให้สวยงาม










เท่านี้กะสิได้แกงสับนก ทั้งเผ็ดทั้งรสชาติจัดจ้านสุดๆ

กินแล้วรับรอง ทั้งแข็งทั้งแฮงกันคุคนครับผม










เอ้า นั่งเฮ็ดหยังอยู่ล่ะอีเย็นเอ้ย มายกไปให้ท่านเจ้าคุณเพิ้นกินท่าแม้
แก้ไขข้อความเมื่อ

แสดงความคิดเห็น
โปรดศึกษาและยอมรับนโยบายข้อมูลส่วนบุคคลก่อนเริ่มใช้งาน อ่านเพิ่มเติมได้ที่นี่