บักอ้ายเข้าครัวมื้อนี้
ขอนำพ่อแม่พี่น้องล่องใต้กันจักหน่อย บักอ้ายจึงขอ
นำเสนอ ตอนที่ 38 และ ตอนที่ 39
V
v
v
v
v
v

คั่วหมูใส่สะตอ






เสริฟมาพร้อม แกงส้มชะอมกุ้งสะตอ





(สืบเนื่องจากกระทู้เก่าก่อนมีผู้บอกว่าอ่านเสียงในฟิล์มของบักอ้ายไม่เข้าใจ บัดนี้บักอ้ายจึงพัฒนาใหม่
บ่ให้มันลาวโพด จะได้อ่านเข้าใจกันง่าย เพราะบักอ้ายอยากสินำเสนอการทำอาหารควบคู่กับการเล่าเรื่อง
ที่ม่วนๆสนุกสนานคันผิดตกกะขออภัย คันผิดใจกะขอโทษเด้อครับ)


มาเริ่มกันโลดเนาะ หลังจากที่เพื่อนสาวสวยผู้หนึ่งนำเอาสะตอและน้ำพริกคั่ว
กับน้ำพริกแกงส้ม พร้อมกะปิมาฝาก (ป้าดลาบปากแท้น้อ)








ฮู้กันบ่น้อครับ ว่ากับข้าวไทยที่มีรสชาติเผ็ดๆ บ่ว่าสิเป็น แกง ต้มยำ หรือว่า น้ำพริก คนโบราณเพิ่นบอกเอาไว้ว่า
มันเฮ็ดให้คนกิน ฮู้สึกว่าเย็นตัวขึ้น เพราะว่าอากาศบ้านเฮามันฮ้อน(ร้อน) พอกินของฮ้อนเข้าไป เฮ็ดให้มันฮ้อนข้างใน
คันข้างในฮ้อน ข้างนอกกะเลยเย็น เพิ่นว่าจั่งสั่น(เขาว่าแบบนั้น)
บักอ้ายกะฟังเพิ่นเว้ามอีกต่อหนึ่งเด้


วันฝนตกที่อากาศฮ้อนอบอ้าวแบบนี้ เฮามาเฮ็ดอาหารปักษ์ใต้ที่มีรสชาติเผ็ดๆกินกะคือสิดีคือกัน
เมนู คั่วหมูใส่สะตอ เสริฟมาพร้อม แกงส้มชะอมกุ้งสะตอนี่ล่ะ คือมันใช่แท้ๆน้อ
เอ้า!!!! อย่าฟ้าว(รีบ)ลุกหนีไปไส่เด้อ มาๆตามมาเบิ่ง บักอ้าย คนอีสานแท้ๆนี่ล่ะ
เข้าครัวเฮ็ดแนวอยู่แนวกินของคนภาคใต้ รับรองว่าแซ่บพอๆกับยกปักษ์ใต้ขึ้นมาไว้เหนือกรุงเทพ
(พุ่นนะ!!!! ขี้คุยคัก บักอ้าย)

เริ่มจากไปตลาดนำกันก่อนเนาะ ไปตลาดสดใกล้ๆนี่ล่ะ บักอ้ายเว้าหลายเทื่อแล้ว (พูดหลายครั้งแล้ว)
ว่าบักอ้ายพยายามสิอุดหนุนพ่อค้าแม่ขาย บ่อยากเข้าโลตัส บิ๊กซี เพราะอยากให้วิถีชีวิตแบบคนไทยยังคงอยู่ไปโดนๆ(นานๆ)
ส่อยกันได้กะส่อยกันไปจั่งซี่ล่ะ (ช่วยกันได้ก็ช่วยกันไป)







หลังจากได้ของครบแล้วเฮามาเบิ่งกันว่ามีส่วนผสมอีหยังกันแน่ เริ่มจากเมนูคั่วหมูใส่สะตอ
หมูสามชั้น 50 บาท บ่ต้องเอามันหลายดอก
สะตอ บ่ได้ซื้อ
พริกแกงคั่วจากปักษ์ใต้ อันนี้กะบ่ได้ซื้อ
กะปิอย่างดีจากปักษ์ใต้ กะบ่ได้ซื้อคือกัน
ใบบักกูด ย่างไปเก็บเอาหลังบ้านแม่ใหญ่น้อย
น้ำปลา
น้ำตาลปี๊บ
พริกชี้ฟ้าแดงสองหน่อย ขอเอาจากบ้านเอื้อยข้างบ้าน กะบ่อต้องจ่ายเงินอีกคือกัน รวมแล้วเมนูนี้
บักอ้ายจ่ายเงินไป 50บาท  บวกค่น้ำปลา น้ำตาลอีก 5บาท ท้อนั้น
ป้าด!!!นี่มันอาหารดีราคาประหยัดของแท้เลยเนาะสู










บัดนี้กะมาฮอด(มาถึง)วิธีเฮ็ดกันโลด
เอาบักพริกแกงมาตำรวมกับกะปิ
(คันบ่ฮักกันอีหลีบ่บอกเด้!! เคล็ดลับพะนะ ใช้พริกแกง2ส่วนต่อกะปิ1ส่วน ที่สำคัญคือ ต้องเป็นกะปีใต้ของแท้ท่อนั้นเด้)





เอาหมูสามชั้นไปรวนในกระทะ บ่ต้องใส่น้ำมันดอก เดี๋ยวน้ำมันมันกะออกมาเอง
แล้วๆตักขึ้นพักไว้ก่อนจากนั้นกะตามลงไปคือน้ำพริกแกงผัดให้หอมจนข้างบ้านเอิ้น(ร้อง)ถามโลด
“บักอ้ายเอ้ย เฮ็ดหยังกินแลงน้อ คือจังหอมแท้”




หลังจากหมูเริ่มสุก กะค่อยปรุงรสด้วยน้ำปลากับน้ำตาลปี๊บ ชิมเบิ่งให้มันนัวๆ แล้วค่อยเติมน้ำเปล่านี่ล่ะ
ลงไปจักหน่อยพอ สุดท้ายกะใส่สะตอกับพริกชี้ฟ้าแดงที่เฮาหั่นไว้แล้ว







ผัดให้สะตอสุก แล้วโรงใบบักกูดลงไป แล้วๆครับ เมนูแรก






มาฮอดเมนูแกงส้มชะอมกุ้งใส่สะตอ
เพิ้นบอกว่าคันสิแกงแบบคนใต้แท้ๆ ต้องใช้สะตอขูดเปลือกแกง แต่ว่าบักอ้ายเอาสะตอแกะแล้ว
เพราะว่าคนท่ากินอยู่เพิ้นบอกว่าขี้คร้านแกะพะนะ

เอ้า บัดนี้ มาเบิ่งเครื่องปรุงทั้งหมดโลด มีรายนามตามนี้
กุ้ง 50 บาท เลือกเอาขนาดพอดีๆ
เครื่องแกงส้มปักษ์ใต้(ของฟรีครับพี่น้อง) ย้ำเด้อ เครื่องแกงส้มจากปักษ์ใต้แท้ๆ บ่จั่งสั้นมันบ่แซ่บ  
สะตอ ของฝากคือกันบ่ได้ซื้อ
ปลาทูต้มโตหนึ่ง 20 บาท ปลาทูเดี๋ยวนี้มันแพงๆเนาะ ตอนบักอ้ายเป็นเด็กน้อย เข่งล่ะ 5 บาทหนึ่งแมะ
บักขามเปียก  5 บาท
น้ำปลา
น้ำตาลปี๊บ
บักมะนาวหน่วยเดียว บาทหนึ่ง
ผักขา(ชะอม) กำหนึ่ง ไปขอบ้านแม่ใหญ่น้อยอีกแล้วกะเลยบ่ได้ซื้อ
ไข่ไก่ 3 หน่วย 15 บาท บักอ้ายใช่หน่วยใหญ่สุดโลด เรื่องอีหยังสิใช้หน่วยน้อยๆ
หมดแล้วเครื่องปรุง รวมๆแล้ว เมนูแกงส้มชะอมทอดของบักอ้ายกะตกอยู่ 96 บาท รวมค่าเครื่องปรุงอีกจัก 4 บาทเนาะ
ท้อกับว่า ราคา 100 หนึ่งพอดิบพอดี ถูกคักถูกแน่














มาลงมือเฮ็ดกันโลด ขยับเข้ามาใกล้ๆ

โอ้มาเถิดหนา กระไรแม่มา
โอ้มาเถิดหนากระไรแม่มา
เร็วเร็วอย่าช้า
เลยนะแม่หน้านวลใย
คนไหนถ้านึกสนุกลุกขึ้นขยับ
ขยับ ขยับขยับขยับเข้ามาไวไว

พุ่นแล้ว เฮ็ดแนงกินปักษ์ใต่ไป กะฮ้องเพลงอ้ายเอกชัยไป มันจั่งแม่น(ช่าง)เข้ากันคัก
ร้องเพลงไปกะเอาปลาทูมาแกะเอาแต่เนื้อไปนำโลด ประหยัดเวลา เพิ่นว่า เวลาบ่เคยคอยไผ๋ พะนะ
ระวังก้างมันน้ำเด้อ แกะแล้วกะใส่ลงไปพร้อมกับกะปิโขลกผสมรวมนำกันกับพริกแกงใต้ของเฮา
อย่าลืมเด้อ พริกแกง 2 กะปิ 1 ท่องจำเอาไว้โลด
แล้วๆกะสิได้เครื่องแกงหน้าตาจั่งซี้
(เอ้า ห่าคั่วเมิงเอ้ย ลืมถ่ายรูปไว้ ขอโทษขออภัยหลายๆพี่น้อง เอารูปนี้ไปเบิ่งก่อน)







แล้วๆกะเอาไข่กับผักขาไปทอดเตรียมเอาไว้ ทอดแล้วกะค่อยเอมาหั่นเป็นชิ้นๆจั่งซี่ล่ะ









แล้วๆเอาใส่น้ำในหม้อ ต้มให้เดือด







แล้วจั่งเทเคื่องแกงส้มปักษ์ใต้ลงไปในหม้อ



ละลายเครื่องแกงด้วยน้ำให้เป็นเนื้อเดียวกัน
.ใส่สะตอก่อนเพราะว่ามันสุกช้ากว่าหมู่
แล้วๆจั่ง ปรุงรสเปรี้ยวจากน้ำบักขามเปียกที่เฮาเตรียมเอาไว้ เติมน้ำปลา น้ำตาลปี๊ป ชิมเบิ่ง เอาตามมักโลด
มักแบบได๋กะปรุงแบบนั้น
เฮ็ดแนวกินมันบ่ได้มีสูตรตายโตดอก
แล้วๆกะใส่กุ้งลงไปในหม้อแกง
ใส่ไข่ทอดผักขาทอดที่หั่นชิ้นเตรียมเอาไว้ลงไป








เริ่มหอมแล้วเด้อปาดที่นี่ ป้าด++น้ำลายบักอ้ายแตกพรากๆ
หลังจากนั้นกะปล่อยให้มันเดือดอีกเที่ย แล้วจั่งยกหม้อลงมาจากเตา


แล้วๆครับพ่อแม่พี่น้อง....แกงส้มชะอม(ผักขา)กุ้งสะตอ
น้ำแกงข้นๆ หอมสะตอหลายๆ






หรอยจังฮั้(ลาวเว้าใต้กะได้คือกันเด้)
เมื่อนี้เฮาสิตกโต๊ะ กินกับข้าวเจ้าแม้ ฮ่าเที่ยว่าดั้งมันสิโด่งขึ้นมาอีกจักน้อย




จัดผักมากินแนมนำเด้อ มันเผ็ด








สุดท้ายนี้บักอ้ายกะขอจบการรีวิวไว้ท่อนี้ มื้อหน้าฟ้าใหม่สิมารีวิวให้เบิ่งอีก
ผิดตกกะขออภัย ผิดใจกะขอโทษไว้หม่องนี้หล้า
หวังว่ารีวิวเที่ยนี้สิเฮ็ดให้ม่วนชื่นกันทุกผู้ทุกคน สวัสดีครับ